[prenta uppsett í dálka] 84. fundur, 125. lþ.
Ögmundur Jónasson:
Herra forseti. Með Schengen-samkomulaginu gerast Íslendingar landamæraverðir fyrir Evrópusambandið og glata fyrir vikið sjálfstæðum rétti sínum til að haga landamæravörslu að eigin vild. Af Schengen-samningnum hlýst sannanlega mikið óhagræði fyrir Íslendinga, mikil fjárútlát, milljarða fjárútlát, auk þess sem erfiðara verður um vik að koma í veg fyrir eiturlyfjasmygl til landsins. Þetta er hins vegar pólitísk ákvörðun byggð á Rómarsáttmálanum eins og staðhæft er í greinargerð þeirrar þáltill. sem við greiðum nú atkvæði um. Með Schengen-samningnum fórna Íslendingar miklum hagsmunum fyrir litla, ef nokkra hagsmuni. Þetta er hins vegar rökrétt vilji menn gera Ísland að héraði í stór-evrópsku ríki. Því er ég hins vegar andvígur og segi nei.
