Jón Bjarnason:
Herra forseti. Það er viðurkennt og hefur margsinnis verið lýst yfir að uppbygging byggðavega, safn- og tengivega um byggðir landsins hefur dregist stórlega aftur úr annarri vegagerð á landinu á undanförnum árum. Meginþungi áherslunnar hefur verið lagður á tengingu þéttbýlisstaðanna og stofnbrautir landsins.
Eitt það mikilvægasta í að efla og styrkja byggð í sveitum er að styrkja þetta vegakerfi. Við höfum samþykkt hér á Alþingi, æ ofan í æ, ályktun um að gera átak í þessum efnum. Nú stendur upp á okkur að fylgja því eftir með gjörðum, ekki bara orðum, herra forseti.