[prenta uppsett í dálka] 86. fundur, 125. lþ.
Ögmundur Jónasson:
Herra forseti. Ég vil byrja á því að þakka hv. þm. Bryndísi Hlöðversdóttur fyrir að hefja þessa umræðu. Í öðru lagi vil ég þakka hv. þm. Einar Oddi Kristjánssyni fyrir skorinorða yfirlýsingu. Hann sagði að við fjárlagasmíðina hefði verið gert ráð fyrir að spara rúman milljarð kr. í lyfjakostnaði. Fjárln. hefði verið talin trú um að þetta hefði mátt gera með kerfisbreytingum. Nú er að koma á daginn að þær kerfisbreytingar ganga ekki eftir.
Hv. þm. Einar Oddur Kristjánsson sagði: Við munum engu að síður standa við markmið fjárlaga. Nú beini ég þeirri spurningu til hæstv. fjmrh. Geirs Haarde: Verður það gert? Mun hann samþykkja að rúmlega eitt þúsund milljónir kr. verði settar á herðar sjúklinga til þess að markmið fjárlaga nái fram að ganga?
