Flm. (Ögmundur Jónasson) (andsvar):
Herra forseti. Þrátt fyrir ýmis fögur orð og fyrirheit er staðreyndin sú að barnadeildarhluta barna- og unglingageðdeildarinnar er lokað um helgar. Umkvörtunarefni aðstandenda þessara veiku barna, sem margir hverjir eru einir á báti, einstæðir foreldrar, var að þeir réðu ekki við þá stöðu mála.
Þetta er staðreynd. Enda þótt aukið fjármagn kunni að hafa verið sett inn í þessa starfsemi þá er þetta staðreynd. Það þarf að koma til móts við þetta fólk og hér er sett fram ákveðin, afmörkuð lausn á þessu afmarkaða máli og spurt er hvort hv. þm. styðji hana.