[prenta uppsett í dálka] 91. fundur, 125. lþ.
Félagsmálaráðherra (Páll Pétursson):
Herra forseti. Ég minnist þess aldrei í minni tíð í félmrn. að málefni Reykjadals hafi verið upp í loft, eins og hér var fullyrt áðan. Einhver vandræði í Reykjadal hafa a.m.k. ekki verið úrlausnarefni hjá félmrn. fyrr en núna á þessu ári að Styrktarfélag lamaðra og fatlaðra ákvað að skilgreina upp á nýtt, væntanlega vegna þess að reksturinn verður dýrari ár frá ári og út af fyrir sig hef ég svo sem skilning á því.
En málið er að þroskaheftir geta átt þarna sumardvöl í sumar eins og venjulega. Síðan er það okkar á Alþingi að taka á því hvernig þessu máli verður háttað í framtíðinni, þ.e. hvernig rekstur Reykjadals verður tryggður áfram. Þetta er einungis ákvörðun sem gildir vegna sumarsins í sumar. Og eins og ég sagði áðan þurfa menn ekki að hafa áhyggjur af því. Það er búið að leysa vandann.
