[prenta uppsett í dálka] 94. fundur, 125. lþ.
Ögmundur Jónasson (andsvar):
Herra forseti. Það er ekkert nýtt sem kom fram í skýrslunni, sagði hv. formaður allshn. Ég sé að hv. þm. Ásta Möller nikkar til samþykkis.
Þá spyr ég á móti: Þegar við fáum skýrslu frá stjórnskipaðri nefnd til að gera úttekt á áhrifum Schengen-samkomulagsins á ferðaiðnað á Íslandi, og í skýrslunni kemur fram að þetta valdi ómældu óhagræði og tilkostnaði þá spyr ég: Hver er ábyrgð hv. þm. og hver er ábyrgð hæstv. utanrrh., sem kemur ekki með nokkur einustu rök gegn þeim staðhæfingum sem við fáum í skýrslunni? Síðan er fullyrt að ekkert nýtt komi fram.
Eru menn staðráðnir í að hlusta á engin rök í málinu? Ég hef auglýst og auglýsi enn eftir rökum hæstv. utanrrh. í málinu. Búið er að færa fyrir því rök að þetta samkomulag valdi okkur ómældu óhagræði og tilkostnaði en við fáum ekki rökin á móti um hagnaðinn og kostina sem þessu eiga að fylgja.
