[prenta uppsett í dálka] 94. fundur, 125. lþ.
Ögmundur Jónasson (andsvar):
Herra forseti. Að forminu mun þetta hafa átt að vera andsvar við ræðu minni en uppistaðan var andsvar við ræðu hv. þm. Kolbrúnar Halldórsdóttur í málinu á undan.
Í málflutningi sínum hér á Alþingi benti hæstv. utanrrh. á, ef ég man rétt, að af Schengen-samstarfinu hlytist margvíslegt hagræði. Er það ekki rétt munað hjá mér? Þar á meðal er væntanlega hagræði fyrir íslenska ferðaþjónustu. Síðan kemur fram álitsgerð frá stjórnskipaðri nefnd til að gera úttekt á einmitt þessu. Þar kemur fram að af þessu samstarfi hljótist óhagræði og mikill tilkostnaður. Þegar við auglýsum eftir rökum fyrir íslensku þjóðina og íslenska skattborgara til að ráðast í milljarða tilkostnað og taka á okkur slíkt óhagræði þá segir hæstv. utanrrh. stutt og laggott: Ég er einfaldlega ósammála þessu. Þarf ekki að færa einhver rök fyrir áliti af þessu tagi? Ég hefði haldið það.
Ég vil einnig vekja athygli á þeim vinnubrögðum að láta Alþingi, ég segi láta Alþingi samþykkja Schengen-samkomulagið eða ljúka umræðu um það degi áður en mikilvægt gagn í málinu kemur fram, eins og þessi rannsóknarskýrsla um áhrifin á ferðamálaiðnaðinn. Mér finnast þetta ekki boðleg vinnubrögð.
