Tómas Ingi Olrich (andsvar):
Herra forseti. Það var ástæðulaust að skilja orð mín svo að ekki mætti skoða þetta, enda var það ekki meiningin með athugasemd minni. Hins vegar langar mig til að benda á að nýting náttúruauðlinda á norðlægum svæðum nýtur mjög víða, eins og ég nefndi í ræðu minni, skattalegrar aðstoðar. Það á í raun við um iðnaðarstarfsemi sem er alþjóðlegs eðlis, eins og olíuvinnslu, vinnslu á málmgrýti og ýmiss konar aðra starfsemi. Hingað til hefur það ekki verið talið mjög erfið hindrun í því samstarfi sem á sér stað innan Alþjóðaviðskiptastofnunarinnar að slíkar skattaívilnanir hafa verið til.