Árni Steinar Jóhannsson (andsvar):
Virðulegi forseti. Ég held að samkvæmt málflutningi forsvarsmanna Samfylkingarinnar í sjávarútvegsmálum sé þeim ekki ókunnugt um áherslur okkar og stefnu því í umræðunni í dag er margbúið að vitna í hana og krefjast ítarlegra svara um einstök mál í stefnunni. Hún virðist lúslesin af forsvarsmönnum Samfylkingarinnar í sjávarútvegsmálum. Ég held því að málin hljóti að standa þannig að samfylkingarfólki sé fullkunnugt um áherslur okkar hvað varðar sjávarútvegsmál. Standi hugur til samvinnu á þeim grunni þá held ég að það sé auðvelt.