[25:13]

Kristján Pálsson (andsvar):

Herra forseti. Það fór ekki fram nein ítarleg könnun, segir hv. þm. Jón Bjarnason. Það var þó gerð könnun. Hversu ítarleg hún var veit ég nú reyndar ekki en birt var niðurstaða úr þessari könnun og þar kom mjög sterklega fram að Hornfirðingar vildu frekar vera í Suðurkjördæminu en í Norðausturkjördæminu.

Það er nú í sjálfu sér merkilegt að bæjarstjórnin á Höfn í Hornafirði skuli ekki taka afstöðu með öðrum hætti eða tekið afstöðu yfirleitt ef hún hefur ekki talið þessa könnun nægilega marktæka. En ég lít svo á að fyrst að bæjarstjórnin hefur ekki viljað taka afstöðu þá hafi hún talið sig fá þarna nægjanlega sterka vísbendingu til þess að leyfa því að ráða ferðinni. Ég lít svo á að í meðförum allshn. hafi þetta mál einmitt verið tekið þannig og að þessi könnun, hversu vísindaleg og yfirgripsmikil sem hún var, ég þekki það ekki eins og ég sagði áðan, hafi samt af þessum aðilum verið talin nægjanlega nákvæm og nægjanlega yfirgripsmikil til þess að mark á henni væri takandi.