[prenta uppsett í dálka] 117. fundur, 125. lþ.
Halldór Blöndal:
Herra forseti. Það hefur borið oft við í þingsölum að sérstaklega hv. þm. Samfylkingarinnar hafa haft orð á því að ríkisstjórninni hafi farist illa í byggðamálum. Þetta er eftirtektarvert í ljósi þess að hv. þm. Samfylkingarinnar sem talaði áðan, hv. 15. þm. Reykv. Ásta R. Jóhannesdóttir, lagði sérstaka lykkju á leið sína til að taka sérstaklega fram að hún teldi óhæft --- ,,óhæft`` var orðið sem hv. þm. notaði --- og það mundi standa stofnuninni fyrir þrifum --- líka það orðasamband sem hv. þm. notaði, ,,að standa stofnuninni fyrir þrifum`` --- ef hún yrði flutt út á land. Hv. þm. lagði sérstakan krók á leið sína til að koma fram þeim skilaboðum að stofnunin mundi bara alls ekki geta gengið ef hún væri staðsett annars staðar en í Reykjavík.
Ég hrökk svolítið í kút, hafði heyrt ýmislegt frá þessum hv. þm. og fór að athuga hlutverk Lyfjamálastofnunar. Það eru allmagar línur, þingmenn geta kynnt sér það. En það var með öðrum orðum skilgreining á þeim verkefnum sem er ekki hægt að sinna úti á landi að mati Samfylkingarinnar.
