[prenta uppsett í dálka] 117. fundur, 125. lþ.
Halldór Blöndal (andsvar):
Herra forseti. Þetta er gamalkunnugt, þetta er endurómur af umræðunum t.d. um Menntaskólann á Akureyri á sínum tíma, fyrir rúmum 70 árum. Þetta heyrðist líka þegar verið var að stofna háskólann fyrir norðan og hjúkrunardeildina þar. Þá var gerð skrá yfir það hvernig Akureyri stæði í sambandi við t.d. sérfræðinga á sviði lækninga, þar eru líka yfirlæknar eins og hér. Þá kom í ljós að einungis á Akureyri voru læknar í 35--37 undirgreinum læknisfræðinnar. Ég held að hv. þm., sem er mikill jafnaðarmaður og verður stundum á að kalla Samfylkinguna jafnaðarmannaflokk, ætti a.m.k. að leyfa aumingja landsbyggðinni að njóta jafnaðar í því að unna henni sannmælis.
