[prenta uppsett í dálka] 119. fundur, 125. lþ.
Kolbrún Halldórsdóttir (um fundarstjórn):
Herra forseti. Það var á misskilningi byggt milli mín og starfsmanna þingsins hvort ég þyrfti að kveðja mér hljóðs við 3. umr. eða í atkvæðagreiðslunni sjálfri og var talið að það nægði að gera það í atkvæðagreiðslunni en svo mun ekki vera.
Það sem ég vildi sagt hafa um breytingar um mat á umhverfisáhrifum er að ég vil ítreka það sem ég sagði í dag um brtt. minni hluta umhvn. sem fjallaði um mat á umhverfisáhrifum og landshlutabundinni skógrækt. Brtt. frá minni hlutanum felur í sér og er samkvæmt mínum skilningi til umræðu hér við 3. umr., að umhverfisáhrif landshlutabundinna skógræktarverkefna skuli metin samkvæmt lögum þessum. Eins og við vitum, herra forseti, stefnir í það að umhverfisáhrif skipulagsáætlana verði metin samkvæmt tilskipun Evrópusambandsins og þar með áhrif af landshlutabundinni skógrækt.
Minni hlutinn í umhvn. og reyndar þingmenn Vinstri hreyfingarinnar -- græns framboðs telja það afar mikilvægt að ákvæði um landshlutabundna skógrækt verði sett inn í þessi lög, enda falli það út úr lögum um landshlutabundin skógræktarverkefni með samþykkt þessara laga. (KHG: Hvað sagði þingmaðurinn um fundarstjórn forseta?)
Ég hef lokið máli mínu, herra forseti.
