Guðjón Guðmundsson:
Herra forseti. Fyrirspurn mín er til hæstv. sjútvrh. og lýtur að undirbúningi hvalveiða. En eins og hv. þm. er ljóst var samþykkt þingsályktun um hvalveiðar í lok síðasta þings þar sem segir m.a., með leyfi forseta:
,,Alþingi ályktar að hefja skuli hið fyrsta hvalveiðar hér við land og tekur fram að ályktun þess frá 2. febrúar 1983 stendur ekki í vegi fyrir því. Veiðarnar fari fram á grundvelli vísindalegrar ráðgjafar Hafrannsóknastofnunarinnar og undir eftirliti stjórnvalda.``
Og síðar í ályktuninni segir:
,,Alþingi felur ríkisstjórninni að undirbúa hvalveiðar, meðal annars með því að kynna málstað og sjónarmið Íslendinga meðal viðskiptaþjóða okkar.``
Spurning mín til hæstv. sjútvrh. er:
Hvernig gengur sá undirbúningur og sú kynning sem Alþingi fól ríkisstjórninni?