[prenta uppsett í dálka] 11. fundur, 125. lþ.
Fjármálaráðherra (Geir H. Haarde) (andsvar):
Herra forseti. Mér þótti kveða eilítið við annan tón í lokaorðum hv. þm. ef hún er að gera því skóna að það ætti frekar að gera þetta hraðar en frv. gerir ráð fyrir.
Við höfum í frv. ákveðið að leggja til að þetta verði gert í fjórum jöfnum skrefum, einkanlega til þess að áhrifin á ríkissjóð á hverju ári verði ekki óhófleg. En jafnframt er þarna farin sú góða leið að ákveða með góðum fyrirvara fram í tímann hvenær breytingar á skattalögunum koma til framkvæmda.
Áður fyrr var mjög mikill misbrestur á því að skattalög væru samþykkt nokkur ár fram í tímann. Hins vegar hefur það batnað í seinni tíð eins og menn þekkja. Til að mynda voru skattalækkanir sem ákveðnar voru 1997 að koma til framkvæmda alveg fram á þetta ár, en ég hygg að affarasælast sé að hrinda þessu í framkvæmd í tiltölulega litlum, afmörkuðum en ákveðnum skrefum.
