[prenta uppsett í dálka] 13. fundur, 125. lþ.
Kolbrún Halldórsdóttir:
Virðulegi forseti. Það mál sem hér ber á góma er alvarlegt og um það ríkir ekki pólitísk sátt. Ég kem upp í tilefni orða hv. þm. Péturs Blöndals um menningarlegt og uppeldislegt hlutverk Ríkisútvarpsins. Það er óumdeilanlega hlutverk Ríkisútvarpsins að vera menningarstofnun. Það er í lögum um ríkisútvarp og ég hef ætíð litið svo á að útvarpið beri þá skyldu hvað þyngst á herðum að útvarpa um land allt menningarefni, dægurmenningarefni og klassísku menningarefni. Það er skylda okkar stjórnmálamanna að standa vörð um þetta hlutverk Ríkisútvarpsins.
Við vitum að í útlöndum hafa stórar ríkisstofnanir menningarlegu hlutverki að gegna og hafa sinnt þeirri skyldu af mikilli reisn. Ég á þá von til handa Ríkisútvarpinu að stjórnmálamenn á Íslandi standi með þessu hlutverki Ríkisútvarpsins, geri því kleift að halda áfram að vera ríkisstofnun og efli menningarlegt og uppeldislegt hlutverk þess.
