Kristján Pálsson:
Herra forseti. Sjálfskipaðir verjendur óbreytts ástands í Ríkisútvarpinu hafa komið upp og hv. þm. Mörður Árnason sagði að við hefðum hreytt ónotum í starfsmenn Ríkisútvarpsins. Þetta er náttúrlega algjör misskilningur. Við höfum ekki hreytt ónotum í starfsmenn Ríkisútvarpsins yfirleitt. Við höfum bent á að þarna er mjög hæft starfsfólk sem hefur ekki fengið vinnufrið og fær ekki að njóta sín í því starfsumhverfi sem því er búið. Það er það sem skiptir máli. Endalaus afskiptasemi af störfum fólks á þessum vettvangi sem kemur í stað faglegrar umræðu innan stofnunarinnar er náttúrlega óþolandi.
Hér kemur hv. þm. Kolbrún Halldórsdóttir og kvartar yfir því að starfsmaður í Ríkisútvarpinu hafi ekki verið beðinn afsökunar. Það er tekið fyrir á Alþingi að starfsmaður í Ríkisútvarpinu hafi ekki verið beðinn afsökunar. Ég átta mig ekki á þessari umræðu, herra forseti.