Kristján Pálsson (andsvar):
Herra forseti. Það er með ólíkindum að hlusta á hv. þm. tala um fölsun á rekstri og að núverandi valdhafar í Hafnarfirði séu að reyna að fela eitthvað. Hans flokkur og hans menn hafa stjórnað Hafnarfirði í áraraðir. Ný stjórnvöld í Hafnarfirði hafa verið að taka við óráðsíu og vandamálum á þessu og hálfa síðasta ári og að tala um að það sé vegna sex mánaða á árinu 1998 er náttúrlega hjákátlegt að hlusta á. Mér finnst að hv. þm. ætti í rauninni að biðja Hafnfirðinga afsökunar á þeim ummælum sem hann hefur látið frá sér fara í þessum ræðustóli í dag.