Fjármálaráðherra (Geir H. Haarde):
Herra forseti. Ég hef ekki haft aðstöðu til þess að kynna mér í þaula þá útreikninga sem hv. þm. vitnaði til. Hitt er ljóst að allir útreikningar af þessu tagi byggja mjög á þeim forsendum sem notaðar eru í hvert skipti, til að mynda um orkuverð, vexti og þess háttar. Ég er alveg sannfærður um að í þeim útreikningum hjá þeim ágætu mönnum sem þingmaðurinn vitnaði til er vafalaust eitt og annað sem umdeilanlegt er. Ég hef tekið eftir því að forstjóri Landsvirkjunar hefur andmælt þessum útreikningum.
Ég minnist þess ekki þegar hv. þm. sat í ríkisstjórn og fyrsta skóflustungan var tekin að virkjuninni að menn væru eitthvað í vafa í ríkisstjórninni, sem þá sat, um arðsemi þessara framkvæmda. Það er eins um okkur í núverandi ríkisstjórn, við erum ekki í nokkrum minnsta vafa um að þetta er arðbær framkvæmd. Hún er hagkvæm fyrir þjóðina alla, hún er þjóðhagslega hagkvæm og hún skiptir miklu máli, ekki bara fyrir fólkið í Austurlandskjördæmi heldur fyrir þjóðina alla.