[prenta uppsett í dálka] 27. fundur, 125. lþ.
Kolbrún Halldórsdóttir (andsvar):
Virðulegi forseti. Orðalagið sem hæstv. iðnrh. las beint upp úr tillögu okkar gefur til kynna hvert mat okkar var á bráðabirgðaákvæðinu þegar textinn var settur saman. Við tölum um að samkvæmt því ,,virðist ekki ...`` ég undirstrika orðið virðist. Það virðist ekki lagaskylda fyrir því að virkjunin fari í lögformlegt mat.
Hins vegar hafa auðvitað fjöldamörg atriði komið upp í málinu, herra forseti, síðan við skrifuðum þennan texta. Það breytir ekki því að við töldum okkur fullkomlega vera að fara með rétt mál. Við drögum í efa í tillögunni sem hæstv. iðnrh. vitnar í, að þetta bráðabirgðaákvæði standist lög, þ.e. að virkjunin geti farið í gegn á því. Og við segjum í tillögunni: ,,... þrátt fyrir að virkjunarleyfi hafi verið veitt.`` Það er ekki stafkrókur um að við teljum þetta virkjunarleyfi vera gilt.
