[prenta uppsett í dálka] 27. fundur, 125. lþ.
Kolbrún Halldórsdóttir (andsvar):
Virðulegi forseti. Það er rangt hjá hv. þm. að mat hafi farið fram. Hins vegar er það rétt hjá hv. þm. að fjöldi rannsókna hefur farið fram. En á þær rannsóknir þarf að leggja mat.
Hæstv. iðnrh., hæstv. utanrrh. og raunar hæstv. forsrh. hafa lýst því yfir að nú sé verkefni Alþingis Íslendinga að leggja mat á þær rannsóknir sem tíundaðar eru í þessum skýrslum. Nú vil ég spyrja hv. formann iðnn.: Hvert eigum við, hv. alþingismenn, að beina óskum okkar um frekari rannsóknir og mat fagaðila á niðurstöðum eða skorti á niðurstöðum úr þeim rannsóknum sem þessi skýrsla hefur tíundað?
Ég vil benda hv. þm. á eitt atriði, virðulegi forseti, í þessari skýrslu sem gefur tilefni til frekari rannsókna. Á bls. 133 í skýrslunni segir um dýralíf, sem hv. þm. nefndi í sinni ræðu:
,,Þrátt fyrir að rannsóknir á dýralífi við Eyjabakka hafi nú staðið yfir í hartnær 30 ár liggja ekki fyrir svör um það hvaða áhrif myndun lóns á Eyjabökkum muni hafa á dýralíf.``
