Tómas Ingi Olrich:
Herra forseti. Ég fellst alveg á þá lýsingu sem hæstv. umhvrh. gaf á þeim heimildum sem í núgildandi lögum eru um gjaldtöku. Sú heimild miðast við að gjaldið sé tekið fyrir veitta þjónustu. Í núgildandi lögum, eins og ég les þau, er ekki heimild til að taka gjald af ferðamönnum fyrir það eitt að njóta náttúrunnar. Það er grundvallaratriði í þessum lögum að það er ekki hægt að gera sér náttúruna að féþúfu.
Ég held að rétt væri að við einbeindum okkur að því á komandi missirum og árum að skoða mjög vel inn á hvaða brautir fara skal í þessum efnum. Það kemur til með að hafa áhrif á, ekki einungis hvernig ferðaþjónustan þróast á Íslandi heldur og hvernig við sjálf umgöngumst okkar eigið land og hvernig við þróum afskipti okkar af landinu. Landið er með stærstu lífsgæðunum sem við eigum.