[prenta uppsett í dálka] 29. fundur, 125. lþ.
Kolbrún Halldórsdóttir (andsvar):
Mig langar að spyrja ráðherrann um útkomuna úr dæminu hjá honum. Ef hagfræðingarnir sem vitnað hefur verið til hér gefa sér rangar forsendur þá spyr ég hæstv. ráðherra: Hvaða forsendur gefur hann sér? Hvaða orkuverð, hvaða raunvaxtastig og hver er þá útkoman úr hans dæmi?
Varðandi 3 milljarðana sem margoft hefur verið rætt um og eru stundum 3,2 milljarðar í skýrslu hæstv. ráðherra sem fylgir þáltill. og stundum 3,08 milljarðar, þá vil ég benda þingheimi á, hæstv. forseti, að í ársreikningi Landsvirkjunar, í efnahagsreikningnum er færð til bókar eign vegna Fljótsdalsvirkjunar, vegna stækkunar Búrfells og fleiri atriða upp á 1.416.462.123 kr. Ég spyr hæstv. ráðherra: Er þetta eignin sem nú er metin í skýrslum upp á 3 milljarða? Ég trúi því ekki að Landsvirkjun geti farið fram á hærri upphæð í skaðabætur en þá sem hún færir sér til eignar í bókum sínum.
