Einar Már Sigurðarson (andsvar):
Herra forseti. Hv. þm. bætir enn í. Nú er talað um peningalegt fúsk. Hv. þm. Pétur Blöndal vakti athygli á því í gær að hv. þm. Ögmundur Jónasson væri nú farinn að hafa hinar mestu áhyggjur af bröskurum þessa lands. Það verður að segjast eins og er að það er ágætt á meðan áhyggjur hv. þm. beinast í þá átt. Ég vona að þær áhyggjur muni ekki reynast á rökum reistar.
Lykilatriðið í málinu er að fjárfestar virðast hafa trú á þessari tilraun. (ÖJ: Það er rangt.) Herra forseti, hv. þm. er ekki að því mér er kunnugt mesti sérfræðingur þjóðarinnar í fjárfestingum, en hv. þm. getur að vísu leynt á sér og það getur vel verið að hann sé meiri sérfræðingur á því sviði en við aðrir hv. þingmenn höfum kynnst. (ÖJ: Það væri kannski rétt að láta málið í mat.)