Kolbrún Halldórsdóttir (andsvar):
Herra forseti. Ég biðst afsökunar á þessum hraða. En við vitum að um styttan ræðutíma er að ræða og ég þarf að koma miklu að og vil í því sambandi benda hv. þm. Einari Má Sigurðarsyni á skýrslu Byggðastofnunar sem fylgir stóru frummatsskýrslunni um álver við Reyðarfjörð.
Ég ætla að vitna í örfá orð, ekki heilar setningar, úr þessari skýrslu sem sanna það að hér þarf frekari rannsókna við varðandi byggðaþáttinn. Þar stendur, m.a.: Hér þarf frekari rannsókna við. Afla þarf nánari upplýsinga. Í heild má segja að búsetuþættirnir séu ekki hagstæðir álverinu. Hér þarf að leggja á frekara mat. Allir þessi þættir þarfnast nánari skoðunar. Meta þarf áhrif betur. Gera viðeigandi ráðstafanir til að bregðast við á jákvæðan hátt.
Og að lokum:
,,Ýmsar nákvæmari rannsóknir eru nauðsynlegar ef mat á áhrifum á að vera marktækt. Eðlilegt er að Byggðastofnun komi að þeim rannsóknum.``
Byggðastofnun gefur óyggjandi yfirlýsingu í þessu plaggi um að hér þarf frekari rannsókna við. Byggðaþátturinn er afskaplega óviss í þessu máli.