[prenta uppsett í dálka] 29. fundur, 125. lþ.
Margrét Frímannsdóttir:
Virðulegi forseti. Ég kem aðeins til þess að lýsa yfir stuðningi við þá aðferð sem hér er beitt og eftir skýringar hæstv. ráðherra á því hvers vegna gjaldtakan er sett í sérstakt frv.
Ég viðurkenni að ég hef ekki haft tíma til þess að fara í gegnum alla greinargerðina. Hvað ef um óreiðu er að ræða og farið er í eftirlitsaðgerðir sem kosta töluvert umfram þetta reglubundna gjald og stjórn Fjármálaeftirlits getur þá ákveðið skv. 7. gr. ,,að viðkomandi eftirlitsskyldum aðila verði gert að greiða samkvæmt reikningi fyrir nauðsynlegt umframeftirlit``?
Ef í kjölfar þess þar sem fyrirtæki hættir störfum og um er að ræða verulegar fjárhæðir sem Fjármálaeftirlitið hefur þurft að leggja út sjálft af fjármagni sínu, er kröfuréttur í þrotabú eða gjaldþrota fyrirtæki? Það má vera að þetta sé mjög skýrt í frv. en ég hef bara ekki tekið eftir því. Ég hef ekki lesið þetta vel í gegn en ég tel það eðlilega og góða stefnu að þeir sem eru eftirlitsskyldir þurfi að greiða fyrir eftirlitið.
