Ásta R. Jóhannesdóttir:
Herra forseti. Mér finnst ástæðulaust að vera með belging út af þessu máli og tína til hverjir mæta á hvaða nefndarfundi. Það er iðulega þannig að frekar sé verr mætt af stjórnarliði á nefndarfundi en stjórnarandstöðu þó að forföll hjá okkur hafi orðið í gær. Aftur á móti vil ég benda á efni málsins. Hér er verið að leggja til, með vísun til 19. gr. þingskapa, að nefndin fjalli á annan hátt um málið, þ.e. opni fundi sína. Ég vitna hér í Morgunblaðið í morgun, með leyfi herra forseta. Þar segir formaður nefndarinnar, hv. þm. Hjálmar Árnason:
,,Mér finnst eðlilegt að með slík mál fari forsætisnefnd. Mér hugnast hugmyndin mjög vel en bendi hins vegar á að við höfum reynt að opna okkur svolítið fyrir almenningi með því að hvetja til þess að fólk hafi samband við okkur í gegnum heimasíðuna og það stendur ekki á viðbrögðum þar, við fáum töluverð viðbrögð við því.
Mér hugnast sem sagt hugmyndin um að opna fundi nefndar en ég tel að hvað það áhrærir eigi forsætisnefndin að taka prinsippákvörðun. Það þarf auðvitað að vera stjórn á störfum þingsins og til þess er forsætisnefndin, að gæta samræmingar, og ég mundi ekki taka það upp að fara fram úr forsætisnefnd, ... Ég tek sem sagt undir hugmyndina en vísa því að öðru leyti til forsætisnefndar.``
Við förum fram á það, herra forseti, að forsn. taki á málinu og opni fyrir aðgang almennings að umræðu um þetta mál eins og lagt er til í greinargerð með þingmálinu og hvað eftir annað kom fram í umræðunum að gert yrði. Við bendum á leið til þess að almenningur geti komið að málinu.
Nú fer ég fram á það, herra forseti, að forsætisnefndin komi saman og taki ákvörðun um það úr því að formaður iðnn. treystir sér ekki til þess.