Forsætisráðherra (Davíð Oddsson) (andsvar):
Herra forseti. Fyrir mitt leyti get ég fallist á hvaða aðferð sem er við að taka þá skýrslu sem hv. þm. nefndi til umræðu, hvort sem við mundum gera það í sérstakri umræðu eða eins og hv. þm. nefndi, í tengslum við þessa umræðu. Þó að þarna sé um formbreytingu að ræða þá get ég út af fyrir sig fallist á það, ef menn telja það skynsamlegt, að fulltrúar flokkanna tjái sig hér og síðan verði málinu frestað. Ef þetta verður raunin þá vænti ég þess að það hafi ekki áhrif á framgöngu málsins sem slíks, fyrir áramót. En ég get fallist á hvora aðferðina sem er, að klára þessa umræðu og hafa síðan aðra umræðu, sérstaka umræðu um þessa skýrslu sem er athyglisverð eða með þeim hætti sem hv. þm. leggur til.