Fyrirspyrjandi (Kristján Pálsson):
Herra forseti. Gömul kona var myrt á hrottalegan hátt í íbúð sinni í borginni sl. föstudag. Tveir menn með lambhúshettur fyrir andlitinu og kylfur í höndum rændu sjoppu í gær. Rán og ofbeldi virðist daglegt brauð. Ungir menn ganga að eldra fólki og hrækja á það.
Þetta er ófögur lýsing en sönn, herra forseti, á ástandinu eins og það er í dag. Fíkniefnalýður gengur laus í hópum og virðist lítið við ráðið. Þeir viðurkenna brot sín og sleppa jafnharðan út nema þá harðsvíraðir morðingjar.
Ég hef heyrt að sumir þessara manna gangi með skammbyssur á sér. Á sama tíma og þessir ofbeldismenn ganga lausir og valda ótta og öryggisleysi hjá saklausum borgurum eru fangelsi landsins að tæmast. Ég spyr því hæstv. dómsmrh.: Eru einhverjar sérstakar aðgerðir í gangi eða í undirbúningi til þess að sporna gegn sívaxandi glæpum og ofbeldi?
Þetta er harður dómur, herra forseti, og hörð ummæli en ég held að enginn geti horft á það sem er að gerast í þessu landi öðruvísi en að taka það alvarlega.