Hjálmar Árnason (andsvar):
Herra forseti. Ég held að ekki sé ágreiningur um það að fjölbreytni í atvinnulífi er afskaplega mikilvæg. Um það snýst málið og það hefur komið fram ítrekað að það er meginmarkmiðið, þ.e. að efla fjölbreytni í atvinnulífi, ekki bara úti á landsbyggðinni heldur í landinu í heild. (Gripið fram í.) Fjölbreytni í atvinnulífi er það sem máli skiptir og að sækja fram á sem flestum sviðum til þess m.a. að draga úr sveiflum í atvinnulífi.
Það er líka vert að árétta það sem fram hefur komið ítrekað í umræðunni, að frv. byggir m.a. á tillögum frá Ríkisendurskoðun. Það kom fram í ræðu hv. þm. Guðjóns Guðmundssonar að við undirbúning þessa máls hlaut hugmyndin stuðning atvinnuráðgjafa og þeirra sem hafa verið að vinna með nýsköpun, ekki síst úti á landsbyggðinni.