[prenta uppsett í dálka] 37. fundur, 125. lþ.
Frsm. meiri hluta fjárln. (Jón Kristjánsson) (andsvar):
Herra forseti. Ég vil aðeins taka fram að í fjárlagafrv. er ekki verið að breyta bótafjárhæðum né prósentum heldur er um afstemmingar að ræða miðað við nýja útgjaldaáætlun Tryggingastofnunar sem byggist á því að lengra er liðið á árið og betri upplýsingar til um útgjöld. Ef þessar fjárhæðir veita svigrúm til að auka við í tryggingakerfinu yrði það að gerast með sérstakri ákvörðun og þau mál eru ætíð til skoðunar. Fjáraukalagafrv. sjálft felur í sér ákvarðanir sem voru teknar fyrr á árinu. Ég vildi að það kæmi fram við umræðuna að ekki er verið að lækka fjárhæðir sem snúa að einstaklingum heldur er verið að endurskoða heildaráætlunina um útgjöld ársins á grundvelli upplýsinga sem liggja nú fyrir en lágu ekki fyrir fyrr á árinu.
