Jón Bjarnason:
Herra forseti. Efling framhaldsnáms og fjarnáms á landsbyggðinni. Þingflokkur Vinstri hreyfingarinnar -- græns framboðs vekur athygli á þeirri miklu mismunun sem á sér stað í aðgengi að framhaldsmenntun eftir búsetu hér á landi. Hér þarf að leita allra leiða til að efla og styrkja námsframboð heima í héruðunum til sjávar og sveita þannig að ungt fólk geti sem lengst búið heima hjá sér og sótt þar nám. Þetta er frumréttur fjölskyldulífs í dag. Það er ótæk sú skipan í menntamálum að sveitarfélög og byggðir með hundruð íbúa ungs fólks 16 ára og til tvítugs geti ekki boðið upp á neina framhaldsmenntun.
Þessi tillaga gengur út á að efla og styrkja framhaldsnám á þeim stöðum þar sem framhaldsskólar eru ekki nú þegar fyrir hendi. Þetta er, herra forseti, eitt brýnasta byggðamálið í dag. Ég segi já.