Jón Bjarnason:
Herra forseti. Við þingmenn Vinstri hreyfingarinnar -- græns framboðs lögðum fram við 2. umr. tillögur um tekjuauka sem m.a. fólu í sér skattlagningu á þá sem mestar og hæstar hafa tekjurnar í þjóðfélaginu og fluttum síðan tillögur á móti um framlög og styrk til þeirra sem lakari kjör hafa og til sérgreindra verkefna. Sú tillaga náði ekki fram að ganga. Milli umræðna hafa komið fram miklar hækkanir á fjárlögum en engu að síður teljum við rétt að afla enn frekari tekna til að styrkja stöðu ríkissjóðs og gera honum kleift að taka á brýnum verkefnum, jöfnunaraðgerðum fyrir landsmenn alla.