Jón Bjarnason:
Herra forseti. Hér er um að ræða fjármagn í varasjóð til þess að koma til móts við þann mikla vanda sem mörg sveitarfélög, sérstaklega úti á landi, standa frammi fyrir vegna þess að þau hafa þurft að leysa til sín félagslegar eignaríbúðir á fullu verði en hafa ekki getað selt þær aftur á sama verði og því hefur safnast upp hjá þeim verulegur halli. Það var rætt um það fyrr í haust, herra forseti, að til umræðu væri hugsanlegt fyrirheit um að leggja fram sérstakt fé í þennan varasjóð eins og lög heimila og því leggjum við þingmenn Vinstri hreyfingarinnar -- græns framboðs þetta afar eindregið til, herra forseti.