Hjálmar Árnason (andsvar):
Herra forseti. Ég hygg að ég hafi svarað báðum spurningum hv. þm. enda hanga þær mjög saman. Ég ítreka það með því að vísa til þess sem stendur í stjórnarsáttmálanum um málið. Þar segir ,,að hefja undirbúning`` og þarf í rauninni ekkert meira að segja um það. Undirbúningur felur það í sér að menn skoða kosti og galla þannig að ákvörðun liggur ekki fyrir. Það er í undirbúningi svo ég svari spurningu hv. þm. alveg afdráttarlaust. Sem sagt, menn eru að skoða málið. Ákvörðun hefur ekki verið tekin um að selja, hvorki grunnnet né Landssíma Íslands hf. í heild sinni. Komi til þess þá kemur það mál til kasta Alþingis og þá mun fara fram pólitísk umræða um þann þátt. En það er bara ekki komið að því.