Hjálmar Árnason:
Herra forseti. Hér er verið að greiða atkvæði um verulega stórt mál fyrir íslenska þjóð. Verði þáltill. hæstv. iðnrh. samþykkt mun hún styrkja atvinnu- og efnahagslíf þjóðarinnar. Verði hún samþykkt mun hún styrkja byggð á Miðausturlandi og þar með snúa þeirri byggðaþróun við sem átt hefur sér stað að undanförnu. Verði hún samþykkt mun hún efla öryggi í rafmagnsframleiðslu landsmanna. Verði hún samþykkt mun hún ýta undir nýtingu vistvænna orkugjafa. Ég segi því já, herra forseti.