Ísólfur Gylfi Pálmason:
Herra forseti. Ég sat einmitt mjög merkilegan fund um þetta málefni í Stapa í Reykjanesbæ í síðustu viku þar sem farið var mjög nákvæmlega yfir þetta mál. Ég tel það vera í býsna öruggum farvegi eins og fram hefur komið hjá hæstv. samgrh. Ég held að óhætt sé að segja að þingmenn frá Suðurnesjum og reyndar Suðurlandi eru býsna samstiga í málinu þannig að við þurfum í rauninni vart um það að deila. Það er í mjög öruggum höndum og mjög öruggum farvegi.
Vissulega er nauðsynlegt að velta upp hugmyndum um járnbrautalest eða eimreið eða hvað við köllum slíkt fyrirbæri en það er í rauninni langtum lengra inni í framtíðinni. Það mál sem hér er rætt er í mjög öruggum höndum og það er líka athyglisvert að skynja það góða samstarf sem er milli lögregluembættanna í Hafnarfirði, á Suðurnesjum og á Keflavíkurflugvelli og Vegagerðarinnar í því að ná niður hraða á þessari braut og það skynja menn sem aka um þá braut.