Össur Skarphéðinsson (andsvar):
Herra forseti. Hæstv. ráðherra sagði að framtíðin skipti meira máli en fortíðin. Ég veit ekki hvort það er rétt í tilviki Framsfl. ef þetta mál verður keyrt í gegn með þessum hætti. Hæstv. heilbrrh. kom í þennan stól m.a. til þess að skapa sér hagfellda fortíð. Hún sagði að á ársfundi Tryggingastofnunar árið 1998 hefði hún sagt að hún liti á þessar breytingar sem réttlætismál. Hvað var það sem hæstv. heibrrh. sagði á þessum ársfundi? Hvað sagði hún í blaðaviðtali sem tekið var 30. september í tilefni af ársfundinum? Þar var hún spurð um hvaða breytingar eigi að fara að gera á almannatryggingakerfinu. Þar segir hún, með leyfi forseta:
,,Stærsta breytingin er að tekjur maka skerði ekki bætur öryrkja.``
Hæstv. heilbrrh. hefur tvisvar sinnum í þessum sal sagt að hún stefndi að því að afnema þessar skerðingar. Hún sagði hið sama á áðurnefndum fundi. Svo kemur hún hingað og segir að hún hafi aldrei sagt þetta heldur ætlað að breyta þessu.
Herra forseti. Hæstv. heilbrrh. verður að hafa kjark, þó hún sé í erfiðri stöðu, til þess að gangast við því sem hún hefur sagt.