[prenta uppsett í dálka] 60. fundur, 126. lþ.
Pétur H. Blöndal (andsvar):
Herra forseti. Ég virði sannfæringu hv. þm. Össurar Skarphéðinssonar sem stafar af túlkun hans og skilningi á dómi Hæstaréttar. Ég hef hins vegar annan skilning og túlkun á dómnum.
Spurningar mínar til hv. þm. eru eftirfarandi:
Er hann sem vinstri maður og jafnaðarmaður hnugginn yfir þeirri niðurstöðu sem hann les úr dómnum sem leiðir til stóraukinnar einstaklingshyggju burt frá samtryggingu og jöfnuði, og bætir stöðu þeirra 10% öryrkja sem best eru settir?
Heildartekjur félaga í ASÍ fyrir dagvinnu og oft mikla yfirvinnu eru að meðaltali 160--170 þús. kr. á mánuði á öðrum ársfjórðungi árið 2000. Tveir slíkir í sambúð eru með 330 þús. kr. á mánuði og margir eru með miklu minna. Þetta fólk greiðir skatta, tekjuskatt og virðisaukaskatt. Þeir eru að meðaltali með lægri heimilistekjur en þeir 700 öryrkjar sem á að fara að hækka hjá en samkvæmt frétt Morgunblaðsins 13. janúar eru þeir með 340 þús. kr. í tekjur árið 1999, ári fyrr. Finnst hv. þm. félagslega rétt og í samræmi við samtryggingaheimssýn sína að leggja auknar skattbyrðar á lágtekjufólk til að hækka heimilistekjur þeirra sem hafa hærri heimilistekjur því bæturnar eru greiddar með sköttum?
