Pétur H. Blöndal (andsvar):
Herra forseti. Ég fór nákvæmlega í gegnum það í ræðu minni hvernig ég komst að þeirri niðurstöðu að það megi taka tillit til tekna fjölskyldu og ég ætla ekki að fara að rekja það allt aftur. En ég bendi á að Hæstiréttur segir þarna ,,með þeim hætti``. Af hverju sagði hann það? Af hverju sagði hann ekki bara ,,samkvæmt þessu``. Af hverju sagði hann ekki bara að þessi grein sé ógild og það hafi komið eitthvað annað í staðinn? Nei, vegna þess að hann gat það ekki. (ÖS: Svo segir í dómsorðinu.) (Gripið fram í.) Ef greinin félli burt þá má ekki greiða neitt, (Gripið fram í.) þannig að það má ekki skerða þetta ,,með þessum hætti``. Það má skerða þetta einhvern veginn öðruvísi. Það les ég út úr dómnum og það skal enginn fá mig ofan af því með svona tómum rökstuðningi.