Utanríkisráðherra (Halldór Ásgrímsson) (andsvar):
Herra forseti. Ég tel að ríkisstjórnin sé ekki að taka áhættu í því. Það má alveg eins halda því fram að það sé ekki í samræmi við mannréttindaákvæði stjórnarskrárinnar hve lítill og lágur þessi lífeyrir er. Það er ekki hár lífeyrir 51 þús. kr. Ég ætla að vona að íslenskt þjóðfélag geti hækkað þennan lífeyri í framtíðinni. En mér finnst út í hött að binda sig við það nú á þessari stundu að geta ekki hækkað hann án þess að hann gangi jafnt til allra og því eigi ekki að miða við tekjur maka í því sambandi. Það vill stjórnarandstaðan hins vegar gera og ég er andvígur því.