[prenta uppsett í dálka] 66. fundur, 126. lþ.
Rannveig Guðmundsdóttir (andsvar):
Herra forseti. Varðandi þau álitamál sem við höfum sett fram spurningar um vil ég taka fram að við erum svo heppin að íþyngjandi lagaákvæðum hvað varðar réttmæta meðferð á útlendingum sem leita hér hælis var ekki þröngvað í gegnum Alþingi fyrir jól og að stærra frv. um heildarlöggjöf um réttindi útlendinga er nú til meðferðar í allshn. Því munum við skoða þessi mál í tveimur nefndum, eins og ég sagði í ræðu minni, og það er þó kostur að þetta fylgist að í skoðun.
En ég spyr ráðherrann: Er nokkuð í þáltill. að þessum samningi sem hindrar að við setjum lög um útlendinga sem fyrst og fremst tryggi réttindi við málsmeðferð, t.d. varðandi hælisleitendur, samkvæmt flóttamannasamningi Sameinuðu þjóðanna? Getum við tryggt framkvæmd flóttamannasamningsins í löggjöf okkar samhliða því að lögfesta þessa tillögu?
