Jóhann Ársælsson:
Hæstv. forseti. Hæstv. menntmrh. nefndi í lok ræðu sinnar að viðræður hefðu farið fram um stofnun framhaldsskóla á Snæfellsnesi. Ég vil að fram komi að ég tel að að því máli sé unnið af miklum áhuga á svæðinu. Menntmrn. og hæstv. menntmrh. hafa tekið jákvætt óskum um að skoða þetta mál í alvöru. Það eru miklar vonir bundnar við að út úr því komi skóli sem geri fólki á svæðinu kleift að stunda nám á framhaldsskólastigi á þessu svæði öllu. Það er ekki vafi á því að þar er á ferðinni besta lausnin, ef mönnum tekst að koma saman skóla fyrir þetta svæði. Vegna fámennisins styrkja menn það helst með því að ná þessu saman í Grundarfirði. Ég tel að þar sé lausn sem menn ættu að vinna að af fullum krafti.