Drífa Hjartardóttir (andsvar):
Herra forseti. Það er alveg óþarfi hjá hv. þm. Ástu Ragnheiði Jóhannesdóttur að gera lítið úr því hvernig fólk nær af sér aukakílóum. Það bara gerir það nákvæmlega á þann hátt sem því þykir best. (Gripið fram í: Með því að berja í hausinn?) Ég er margbúin að segja að það er ekki aðalatriðið í þessari íþróttagrein og hún er því miður mjög ranglega kynnt þegar þegar verið er að bera hana saman við hnefaleika. Þetta er í rauninni mjög ósanngjarnt vegna þess að áhugamannahnefaleikar eru með öruggustu íþróttagreinum sem stundaðar eru í heiminum að mati þeirra sem best þekkja til.