Flm. (Gunnar Birgisson) (andsvar):
Virðulegi forseti. Það er einmitt málið og þingmaðurinn hitti naglann á höfuðið þegar hún sagði að þetta væri spurning um frjálst val, að velja þá íþrótt sem menn vilja stunda en forsjárhyggjuflokkurinn vinstri grænir eru á móti slíku. Hér er verið að reyna að rugla saman ólympísku boxi og atvinnumannaboxi. Þetta er alveg rangur málflutningur. Þingmenn sem hafa verið að tala á móti þessu reyna að rugla þessu saman til að sverta málið.
Ég fór yfir það í inngangsræðu minni að munurinn á þessu tvennu er gífurlega mikill og enn og enn og aftur er verið að draga í efa rannsóknir sem hafa sýnt að ólympískir hnefaleikar eru með eina minnstu meiðslatíðni í íþróttum, mun minni en t.d. amerískur fótbolti eða hafnabolti eða knattspyrna og svo lengi má telja. Við skulum því fara alveg rétt með staðreyndir í málinu.