Ásta R. Jóhannesdóttir (andsvar):
Herra forseti. Hv. þm. talar um skattalækkun ríkisstjórnarinnar og allt hið góða sem af henni hlaust. En ég vil bara minna hv. þm. á það hver greiddi fyrir þessa skattalækkun. Hver greiddi fyrir hana? Ég veit ekki betur en það hafi verið lífeyrisþegar á lágmarksgreiðslum. Þeir eru komnir undir skattleysismörk sem eru eingöngu með greiðslur úr almannatryggingunum og búa einir og eru kannski með 70.000--73.000 kr., þeir borga skatta. Þeir borga tugi þúsunda í skatta á ári vegna þess að skattleysismörkin hafa staðið í stað í tíð ríkisstjórnarinnar þangað til nú nýlega. Þeir sem greiddu þessa skattalækkun fyrir fyrirtækin hjá þessari ríkisstjórn voru lífeyrisþegar. Ég vil bara minna hv. þm. á það. Þannig hefur þessi ríkisstjórn haft milljarða af lífeyrisþegum í landinu, bæði öldruðum og öryrkjum.