[prenta uppsett í dálka] 86. fundur, 126. lþ.
Ögmundur Jónasson (andsvar):
Herra forseti. Ég held að það sé einfaldlega ekki rétt að þetta hafi leitt til hagstæðara verðs. Ég minni á að iðulega er lagt upp með samkeppni að leiðarljósi og markmiði. Þegar upp er staðið búa menn hins vegar við einokun. Það hefur gerst í greinum sem þessum.
Ég tek undir það sem fram kom hjá hv. þm. um að þessi breyting á rekstrarformi getur auðveldað samruna. Í reynd eru það sveitarfélög og ríki sem eftir sem áður eiga þetta fyrirtæki, alla vega fyrst í stað. Ég vakti sérstaka athygli á því sjónarmiði sem fram kom hjá hv. þm. og hann hnykkti á í andsvari sínu að við erum að færa okkur yfir í nýja hugsun, frá því að veita þjónustu yfir í fyrirtæki sem er smíðað til að skapa eigendum sínum arð og stunda viðskipti á samkeppnissviði. Við það set ég stórt spurningarmerki og hef miklar efasemdir um að það komi landsmönnum til góða þegar upp er staðið nema síður sé.
