[prenta uppsett í dálka] 87. fundur, 126. lþ.
Árni Steinar Jóhannsson (andsvar):
Virðulegi forseti. Ég veit ekki hverju það sætir að samfylkingarmenn efast stöðugt um að ég hafi verið hér í þinghúsinu. Ég bendi hv. þm. Lúðvíki Bergvinssyni á að fletta því upp á morgun og komast að því að ég var þingforseti allan tímann sem hann talaði.
Kannski er ekki svo langt á milli skoðana okkar. Ég veit ekki betur en ég hafi verið að tala um að ég teldi óráðlegt að fara út í að selja ríkisbankana, hefðu menn plön um sjóðsmyndun af þessu tagi. Út frá okkar bæjardyrum séð væri heppilegra að hafa stóran og öflugan ríkisbanka, ekki alfarið í eigu ríkisins en þó að meiri hluta, einmitt til að hafa hlutina á þessum bankalegu forsendum. Ég get ekki séð að það sé svo ýkja mikið sem okkur greinir á um en ég mun líka fletta upp í ræðu hv. þm. Lúðvíks Bergvinssonar í fyrramálið. Ég tel mig muna að hann hafi sagt í þingræðu áðan meðan ég sat á forsetastóli, að bankastarfsemin í landinu væri langbest komin í höndum einkaaðila og það væri bjargföst trú hans.
