Gísli S. Einarsson:
Virðulegur forseti. Ég, ásamt mörgum öðrum þingmönnum, deili áhyggjum með hv. þm. Jóni Bjarnasyni um þessi mál. Ég vil t.d. nefna að á einum stað í Vesturlandskjördæmi, í Búðardal, er núna verið að tilkynna helmingsskerðingu á opnunartíma. Þar verður ekki hægt að koma pósti frá sér nema í fjóra tíma á dag en hins vegar verður hægt að komast í pósthólf. Þetta er gert með einni tilskipun. Starfsmenn fá hana í hendur. Ég hef áhyggjur af því að þegar gripið er til þannig hagræðingar þá sé ekki litið til þess að útvega störf á móti. Ég er sammála því að það geti þurft að hagræða. Aftur á móti verður að sjá til þess að fólk standi ekki uppi atvinnulaust eftir hagræðinguna. Ég nefni sem dæmi að þetta bréf barst til Búðardals 19. mars, bara ein tilskipun: Afgreiðslutími styttur um helming frá því sem verið hefur.