Þórunn Sveinbjarnardóttir:
Herra forseti. Mig langar af þessu tilefni spyrja hæstv. umhvrh. um mat hennar á þeim viðbrögðum eða þeim fréttum sem borist hafa frá Bandaríkjunum um að stjórn Georges Bush hafi snúið baki við Kyoto-ferlinu. Það skiptir verulegu máli upp á framhaldið og upp á fundi aðildarríkjanna sem verða væntanlega síðar á þessu ári.
Íslenska ríkisstjórnin hefur eins og kunnugt er verið í regnhlífarhópnum þar sem Bandaríkjastjórn hefur farið fyrir á undanförnum fundum og m.a. á aðildarríkjaþinginu í Haag. Ríkisstjórnir Evrópusambandsins hafa brugðist ókvæða við fréttunum frá Bandaríkjunum og mér þætti fengur í því að heyra mat hæstv. umhvrh. á því hvaða áhrif þetta gæti haft á ferlið.